Mamlakatimizda Prezident Islom Karimov tashabbusi bilan 2002-2010 yillarda kompyuterlashtirish va axborot-kommunikatsiya texnologiyalarini rivojlantirish dasturi qabul qilinib, izchil amalga oshirilmoqda. Dasturni ro‘yobga chiqarishda axborot ta’minoti muhim o‘rin tutadi.

Shu bois O‘zbekiston axborot makonida maxsus nashr chop etila boshlandi. Unda respublikamiz va xorijda axborot-kommunikatsiya texnologiyalari va internetni joriy etish hamda rivojlantirish dasturlari, loyihalarining amalga oshirilishi borasidagi eng ilg‘or yutuqlar, axborot-tahlil materiallari, zamonaviy texnologiyalarni joriy etish natijalari, sohadagi eng so‘nggi yangiliklar sharhi keng yoritiladi.

Aloqa va axborotlashtirish sohasida “ICTNEWS” axborot-tahlil bulleteni O‘zbekiston aloqa va axborotlashtirish agentligi, Elektromagnit muvofiqlik markazi, “UNICON.UZ” davlat unitar korxonasi va “CIB GROUP” mas’uliyati cheklangan jamiyati muassisligida tashkil etildi.

“ICTNEWS” axborot-tahlil bulletenini chop etishdan maqsad keng o‘quvchilar ommasini tezkor yangiliklar va tahliliy materiallar, aloqa va axborotlashtirish sohasi, davlat boshqaruvi, biznes hamda ijtimoiy hayotda axborot-kommunikatsiya texnologiyalarini joriy etish va qo‘llash borasidagi ilmiy-texnik yutuqlar haqidagi dolzarb axborot bilan ta’minlashdan iborat.

Nashrning barcha axborot-tahlil mahsuloti rasmiy materiallar va statistika ma’lumotlari, tahliliy hisobotlar, davlat organlari, korxona va tashkilotlar, xalqaro tashkilotlar, tahlil bilan shug‘ullanadigan kompaniyalar hamda ishonchli internet-manbalar sharhlari hamda press-relizlarga asoslanadi. Bulleten “AKT: joriy etish va rivojlantirish”, “Texnologiyalar”, Xorijda”, Tahlil”, “Voqea va tadbirlar” kabi bo‘limlarni o‘z ichiga oladi.

UzA