Hay`at “Qishloq telekomunikatsiya tarmog`ini rivojlantirish, qishloq axolisi va infrotuzilma ob`ektlarini sifatli telefon aloqasi bilan ta`minlashda SGM qurilmasidan va simsiz aloqa texnologiyalaridan foydalanish to`g`risida”gi masalani ko`rib chiqdi.

Ushbu masala yuzasidan «O`zbektelekom» AK bosh direktorining birinchi o`rinbosari J.Maxsudov so`zga chiqdi. Uning ta`kidlashicha «O`zbektelekom» AK tomonidan respublika telekommunikatsiya tizimining rekonstruksiyasi yuzasidan olib borilayotgan ishlar natijasida, mamlakatimizning shahar va qishloqlariga zamonaviy aloqa vositalari yetib borishi, infratuzilma ob`ektlarini va qishloq aholi maskanlarini telefonlashtirish bo`yicha muayyan ishlar olib borilmoqda.

«O`zbektelekom» AKning telekommunikatsiya tarmog`ida jami umumiy montaj sig`imi 358.964 raqam bo`lgan 1556 ta qishloq ATSlari mavjud bo`lib 90744 tasi yoki 25% raqamlidir. Shuningdek 11 922 qishloq aholi maskanlari mavjud bo`lib, shundan 73% simli aloqa tarmog`i bilan qamrab olingan.

2008 yil I chorak mobaynida qishloq telefon tarmog`ida asosiy telefon apparatlari soni 1352 taga o`sdi va 267098 tani tashkil etib, shundan 89% axoliga o`rnatilgan.
Qishloq ATSlarining o`rnatilgan sig`imdan foydalanish koeffitsiyenti 01.04.2008yil holatiga 75%ni tashkil etdi.

Qishloq telekommunikatsiya tarmog`ini rivojlantirish qishloq aholisi va infratuzilma ob`ektlarini sifatli telefon aloqasi bilan ta`minlash maqsadida, «O`zbektelekom» AK tomonidan CDMA-450 simsiz aloqa texnologiyasi asosidagi tarmoq kengaytirilmoqda. Shuningdek, mahalliy ishlab chiqaruvchi «Koinot» OAJning SGM rusumli raqamli konsentratorlarini «Toshkent Telekom» va «Buxoro Telekom» filiallarida ijobiy tajriba sinovidan o`tkazilganligini inobatga olgan holda, qishloq telekommunikatsiya tarmog`ida tatbiq etish ishlari olib borilmoqda.

Yig`ilishda Shuningdek, ushbu masa yuzasidan “Koinot” OAJ direktori S.Faxrutdinovning ma`lumoti tinglandi.

O`zbekiston Respublikasi Prezidentining 2002 yil 26 sentyabrdagi 3135 – son farmoni va Vazirlar Maxkamasining 27 sentyabr 336-sonli qaroriga asosan “Koinot” OAJtining asosiy vazifasi etib axborot-kommunikatsiya texnologiyalari vosita-larini mamlakatimizning o`zida ishlab-chiqarishni yo`lga qo`yish belgilangan.

- Bu borada 2003 yildan boshlab bir qancha ijobiy ishlar amalga oshirildi. 10dan ortiq turdagi zamonaviy telekom-munikatsiya uskunalari yaratildi, ishlab chiqarish yo`lga qo`yildi va ular respublikamiz aloqa korxonalari tarmoqlarida ishlatilmoqda deya ta`kidladi ma`ruzachi.

Respublikadagi qishloq infratuzulmalarini va qishloq axolisini telefon aloqa xizmatiga bo`lgan talabini qondirish maqsadida  «Koinot» OAJida 2005 yildan boshlab, zamonaviy va jaxon andozalariga javob beradigan kommutatsiya qurilmalarini yaratish ustida ish boshlab yuborildi.   2006 yilning boshida Toshkent-Telekom filialining Yangiyo`l telefon tarmoqlari bog`lamasining  Ozod qishlog`iga  sig`imi 64-raqamli kommutatsion qurilmasi o`rnatilib, sinovdan o`tkazish ishlari boshlab yuborildi.

Hay`atni O`zbekiston aloqa va axborotlashtirish agentligi bosh direktorining birinchi o`rinbosari A.Izbosarov olib bordi.

Muhokama qilingan masalalar yuzasidan Hay`at tegishli qarorlar qabul qildi.